XIV Далай лам: Миний дараагийн дүрийг Гандан Поврон ордон тодруулна
Арван дөрөвдүгээр Далай лам Данзанжамц өчигдөр Төвөдийн цагаачлалын Засгийн газрын албан ёсны вэбсайтаар дамжуулан мэдэгдэл хийлээ. Энэ мэдэгдлээрээ тэрбээр Далай ламын институц цаашид хэвээр үргэлжлэн дараагийн Далай ламыг уламжлал ёсоор тодруулна гэдгийг нотолсон байна. 2011 оны есдүгээр сарын 24-нд болсон Төвдийн оюун санааны уламжлалын удирдагчдын уулзалтан дээр “Далай ламын дараагийн дүрийг тодруулах эсэх нь энэ асуудалд шууд хамаатай хүмүүсийн шийдэх асуудал мөн” хэмээн тэмдэглэснээ тэрбээр юуны түрүүнд дурджээ. Улмаар “Өнгөрсөн 14 жилд миний бие энэ асуудлаар ямарваа нэг мэдэгдэл хийж байгаагүй боловч энэ хугацаанд Төвдийн цагаачлалын Засгийн газрын гишүүд, олон нийтийн байгууллагууд, Хималайн бүс нутаг, Монгол улс, ОХУ-ын Буддын шашинт Бүгд найрамдах улсууд болон эх газрын Хятадыг оролцуулаад Азийн Буддын шашинт орнуудын сүсэгтэн олноос Далай ламын институцийг хэвээр хадгалахыг хүссэн хүсэлт удаа дараа ирлээ. Мөн Төвөд дэхь манай ард түмнээс янз бүрийн шугамаар ийм хүсэлт ирсээр байна. Эдгээр хүсэлтийг харгалзан үзсэний үндсэн дээр, Далай ламын институц цаашид хэвээр үргэлжилнэ гэдгийг нотолж байна” хэмээн мэдэгджээ. 2011 оны есдүгээр сарын 24-ний мэдэгдэлд дурдсанчлан Далай ламын дараагийн дүрийг тодруулах ажиллагааг Дээрхийн гэгээн XIV Далай ламын Тамгын газар буюу Гандан Поврон ордон дангаар хариуцна гэдгийг мэдэгдэлд тэмдэглэсэн байна. Гандан Поврон ордны хариуцлагатай хүмүүс Төвөдийн Буддын шашны янз бүрийн уламжлалын удирдагчидтай зөвлөлдсөний үндсэн дээр Далай ламын дараагийн дүрийг эрэн хайх, тодруулах ажлыг нэгэнт тогтсон дэг жаягийн дагуу зохион байгуулах ёстойг XIV Далай лам мөн онцлон тэмдэглэжээ.
Гэрэл зургийн эх сурвалж: www.dalailama.com
ТӨСТЭЙ МЭДЭЭ
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.