Г.Батцэнгэл: 3×3 баг Олимпын эрх авч чадаагүйд би хариуцлага хүлээнэ
Чихэнд чимэгтэй
2024-05-20
Унгар улсын Дебрецен хотноо болсон сагсан бөмбөгийн 3х3 төрлийн Олимпын эрх олгох сүүлчийн тэмцээнд Монголын шигшээ баг өчигдөр хожигдсон билээ. Үүнтэй холбогдуулан Монголын сагсан бөмбөгийн холбооны ерөнхийлөгч Г.Батцэнгэл үүрэгт ажлаа өгөхөө өнөөдөр мэдэгдлээ. Тэрбээр “Дүрэм журам, ёс зүйн зарчмыг тамирчдадаа ойлгуулан, хэвшүүлэх нь бидний үүрэг юм. Олимпын эрх авч чадаагүйн хариуцлагыг миний бие дангаараа бүрэн хариуцаж Монголын сагсан бөмбөгийн холбооны ерөнхийлөгчийн үүрэгт ажлаас чөлөөлөгдөх хүсэлтээ гаргах болно. Өнөөдрийг хүртэл хөгжлийн төлөө хамтран ажилласан хамт олон, хөгжөөн дэмжигчдэдээ баярлалаа” гэж "X" хуудсандаа өнөө өглөө мэдэгдсэн байна. Монголын сагсан бөмбөгийн холбооны дүрмийн дагуу дэд ерөнхийлөгч нь холбооны цаашдын ажлыг Удирдах зөвлөл, ерөнхий нарийн бичгийн даргын ажлын албаны хамт хариуцан ажиллана. "Энержи Ресурс" компанийн гүйцэтгэх захирал Г.Батцэнгэл 2022 оны дөрөвдүгээр сард энэ албыг хүлээж авсан бөгөөд холбооны зөв засаглалыг бэхжүүлж, санхүүгийн тал дээр бие даалгахад анхаарч ажиллахаа мэдэгдэж байв. Мөн 2014 оноос хойш олон улсын тэмцээнд оролцож чадаагүй манай тамирчид 2022 онд Ханжоугийн Азийн наадмын 3х3 болон 5х5 төрөлд эрэгтэй, эмэгтэй багаараа оролцсон билээ. Үүнээс хойш тэд олон улсын тэмцээнүүдэд тогтмол өндөр амжилт гаргасаар Олимпод оролцох эрхийн төлөө сагсан бөмбөгийн хөгжил өндөртэй улсуудтай эн тэнцүү өрсөлдөх хэмжээнд хүрсэн нь энэ юм.
ТӨСТЭЙ МЭДЭЭ
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.