Дэлхийн алдартай балетчид Монголд ирнэ

Б.Бадамзул

Чихэнд чимэгтэй

2024-08-27

Монголын алдартай балетчин У.Бат-Эрдэнийн урилгаар дэлхийн арван шилдэг балетчин Монголд ирж есдүгээр сарын 14-нд гала тоглолт хийх гэж байна. Тухайлбал, ОХУ-ын балетчин, "Мариинский" театрын тэргүүн гоцлооч, 22 настай Мариа Хорева "Хунт нуур” балетын цагаан хунгийн дүрд тоглоно. Мөн тус театрын тэргүүн гоцлооч Елена Свинко, Максим Изместьев нар түүнтэй хамт ирэхээр болжээ. Түүнчлэн АНУ-ын "New York City Ballet", Аргентины "Teatro Colon" театрын тэргүүн гоцлооч байсан Ана София Шеллер “Эсмеральда” балетад тоглоно. Тэднээс гадна ОХУ-ын Их театрын тэргүүн гоцлооч Владислав Лантратов, Екатерина Крысанова, Казахстан улсын балетчин Бахтияр Адамжан, Германы “Штаатс Опера”, АНУ-ын “American Ballet” театрын тэргүүн гоцлооч Даниил Симкин, Унгарын Үндэсний театрын тэргүүн гоцлооч Татьяна Мельник, Раманбек Бейшеналиев нар гала тоглолтод оролцохоор болжээ. У.Бат-Эрдэнэ нь Пермийн балетын сургуулийг 1989 онд төгссөн, Москвагийн Их театрын тэргүүн гоцлооч байсан бөгөөд өдгөө АНУ-ын Нью-Йорк хотод балетын багшаар ажилладаг байна. Тэрбээр мөн дэлхийн балетын хамгийн нэр хүндтэй уралдааны нэгийг зохион байгуулдаг "World Ballet Grand Prix" байгууллагын уран сайхны удирдаач юм.