Барилгын хог хаягдал боловсруулах үйлдвэртэй боллоо

Н.Ариунсайхан

Чихэнд чимэгтэй

2024-10-01

Хан-Уул дүүргийн 12 дугаар хороо, Морингийн даваанд барилгын хатуу хог хаягдал дахин боловсруулах үйлдвэр ашиглалтад орууллаа. Уг үйлдвэр нь эрүүл ахуйн шаардлага хангасан шинэ ландфиллын байгууламж, барилгын хог бутлан ангилах үйлдвэрийн талбай, машин механизмын гарааш болон оффисын барилгаас бүрдэх цогц байгууламж юм. Мөн ландфил нягтаршуулагч, барилга нураалтын экскаватор, бульдозер, дугуйт ачигч, усны машин, өөрөө буулгагч автомашин зэрэг, үйлдвэрийн үйл ажиллагаанд зайлшгүй шаардлагатай нийт 29 нэр төрлийн хүнд даацын машин механизм, сэлбэг хэрэгсэл шинээр нийлүүлсэн байна. Ландфиллын байгууламж жилд 8.5 сая тонн хог хаягдлыг хүлээж авах хүчин чадалтай бол барилга нураалтын хог хаягдлыг дахин боловсруулах хүчин чадал өдөрт 100 тонн байна. Уг үйлдвэрийг барихад Европын холбоо, Европын сэргээн босголт, хөгжлийн банк буцалтгүй тусламж үзүүлжээ. Улаанбаатар хотын хэмжээнд төвлөрсөн гурван хогийн цэгт жилд дунджаар 1.4 сая орчим тонн хог хаягдал цуглардаг. Үүний 20-30 хувийг барилгын хог эзэлдэг байна.